ཀླུ་ཁྱུང་།
དེང་གི་དུས་སྐབས་འདིར་འཇིག་རྟེན་གོ་ལ་ཟླུམ་པོ་འདིའི་ཐོག་གི་རྒྱལ་ཁབ་ཆེ་ཆུང་འདྲ་མིན་དང་། ཡང་ན་ཚོགས་སྡེའམ་མི་སྒེར་སུ་འདྲ་ཞིག་ཡིན་ཡང་། ཚང་མས་རང་དབང་དང་འདྲ་མཉམ། དམངས་གཙོ་དང་ཞི་བདེ་ཡི་ལམ་ཁ་ཞིག་ལ་འཚོལ་སྙེག་བྱེད་ཀྱིན་ཡོད་ལ། འཇིག་རྟེན་མི་སྡེ་གར་ཁྱབ་ཀྱི་མི་དམངས་རྣམས་ཀྱི་བསམ་བློའི་ཁ་ཕྱོགས་དང་སྤྱི་ཚོགས་འཕེལ་རིམ་དེའང་འཛམ་གླིང་དམག་ཆེན་གཉིས་པའི་རྗེས་ནས་བཟུང་ལོ་རྒྱུས་ཀྱི་གནས་བབ་དང་མི་དམངས་ཀྱི་མངོན་འདོད་མཚོན་པའི་འཚོ་བའི་དགོས་མཁོ་འབའ་ཞིག་གི་ཕྱིར་དུ་ཡར་རྒྱས་ཀྱི་རྣམ་པ་ཤུགས་ཆེར་མངོན་ཡོད། དེ་བཞིན་དུ་འཇིག་རྟེན་འདིའི་ཐོག་གི་རྒྱལ་ཁབ་ཕལ་མོ་ཆེ་མི་རིགས་གཅིག་དང་རིག་གཞུང་གཅིག་གི་ལོ་རྒྱུས་བྱུང་རིམ་ལ་རྨ་མ་བྱུང་བར་རྒྱལ་ཁབ་གཅིག་གི་ངོ་བོར་གནས་ཡོད་པའང་ཤིན་ཏུ་ཉུང་ཞིང་། མང་ཆེ་བ་མི་རིགས་མི་འདྲ་བ་མང་པོ་ཕྱོགས་གཅིག་ཏུ་འདུས་ནས་ཐུན་མོང་གི་ཚོགས་སྤྱི་ཞིག་ཏུ་གྲུབ་ཡོད་མོད། དེ་དག་གི་སོ་སོའི་སྐད་དང་ཡི་གེ ལོ་རྒྱུས་དང་རིག་གཞུང་། གནས་ཡུལ་ས་ཁོངས་སོགས་ལ་དབྱེ་མཚམས་གསལ་བོར་ཕྱེས་ཡོད།
