ཞི་བདེའི་སྔོན་འགྲོའི་གྲོས་འཆར་དོན་ཚན་ལྔ།

ཞི་བདེའི་སྔོན་འགྲོའི་གྲོས་འཆར་དོན་ཚན་ལྔ།

ཕྱི་ལོ༡༩༨༧ཟླ་༩ཚེས༢༡ཉིན་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐོག་༧གོང་ས་༧སྐྱབས་མགོན་ཏཱ་ལའི་བླ་མ་མཆོག་ནས་བསྩལ་བའི་བཀའ་རྩ་ཁྱབ་བསྒྲགས།

༄༅།། འཛམ་གླིང་འདིའི་སྟེང་ཚང་མ་གཅིག་ལ་གཅིག་བརྟེན་གྱི་འབྲེལ་བ་ཇེ་ཆེར་འགྲོ་བཞིན་པར་བརྟེན། རྒྱལ་ཁབ་གཅིག་གམ། མངའ་ཁུལ། ཡང་ན་འཛམ་གླིང་ཁྱོན་ཡོངས་ལ་ཞི་བདེ་ཡུན་གནས་ཡོང་བར་ང་ཚོས་འཕྲལ་སྒང་གི་དགོས་མཁོ་ཙམ་ལ་མ་བལྟས་པར། རྒྱ་ཆེའི་ཁེ་ཕན་གཞི་རྩར་བཟུང་བའི་ཐོག་ནས་བསམ་བློ་གཏོང་དགོས་པ་ཡིན། ད་ལྟའི་དུས་སྐབས་འདི་ཉིད་གལ་འགངས་ཆེན་པོ་ཞིག་ཡིན་པས། ང་ཚོ་སྟོབས་ཤུགས་ཆེ་ཆུང་གང་འདྲ་ཞིག་ཡིན་རུང་རང་རང་འཁོས་དཔག་གི་ནུས་པ་རེ་འདོན་ཐབས་བྱ་རྒྱུ་ཤིན་ཏུ་འགག་རྩ་ངཆེ་བའི་དོན་གནད་ཅིག་ཡིན། དེ་རིང་འདིར་ངོས་ནས་བོད་མི་དམངས་ཀྱི་འགྲོ་ཁྲིད་ཡིན་པ་དང་། བྱམས་དང་སྙིང་རྗེའི་རྩ་བ་ཅན་གྱི་ཆོས་ལ་དད་མོས་བྱེད་མཁན་ངགྱི་དགེ་སློང་ཞིག་ཡིན་པའི་ཆ་ནས་ཁྱེད་རྣམ་པར་གཏམ་བཤད་བྱེད་ཀྱི་ཡོད། གཙོ་ཆེ་ཤས་སུ། དེ་རིང་འདིར་ཁྱེད་རྣམ་པ་དང་། སྤུན་ཟླ་གཞན་ཚང་མ་དང་ལྷན་ཅིག་ཏུ་སའི་གོ་ལར་ཐུན་མོང་དུ་སྤྱོད་མཁན་འགྲོ་བ་མི་འདྲ་མཚུངས་ཤིག་ཡིན་པའི་ཆ་ནས་ཁྱེད་རྣམ་པའི་ཁྲོད་འདིར་སླེབས་ཡོད། འཛམ་གླིང་འདི་ཉིད་ཇེ་ཆུང་ཇེ་ཆུང་དུ་འགྲོ་བ་དང་ཆབས་ཅིག་ཚོ་ཕན་ཚུན་གཅིག་ལ་གཅིག་བརྟེན་གྱི་དགོས་པ་སྔར་ལས་ཆེ་རུ་འགྲོ་བཞིན་པ་ཡིན། འདི་ནི་ངོས་རང་གང་ནས་ཡོང་སའི་གླིང་ཆེན་དེ་ཉིད་ཐེ་བས་འཛམ་གླིང་གི་ཆ་ཤས་ཚང་མར་གནས་སྟངས་གཅིག་གྱུར་ཡིན།

ད་ལྟའི་གནས་སྐབས་འདིར་ས་གནས་གཞན་དག་དང་འདྲ་བར་ཨེ་ཤ་ཡའི་གླིང་ཆེན་ནང་དུ་ཛ་དྲག་གི་ཚོར་བ་ཚད་མཐོར་སླེབས་ཡོད་པ་མ་ཟད། ཤར་དབུས་ཨེ་ཤ་ཡ་དང་། ལྷོ་ཤར་ཨེ་ཤ་ཡ། ངོས་ཀྱི་ཕ་ཡུལ་བོད་བཅས་པའི་ནང་འཐབ་རྩོད་དངོས་སུ་བྱེད་བཞིན་པ་ཡིན། འཐབ་རྩོད་འདི་དག་ནི། གཙོ་ཆེ་བ་ཁུལ་དེའི་སྟོབས་ཆེན་རྒྱལ་ཁབ་ཕན་ཚུན་དབར་ལ་མངོན་མེད་བག་ལ་ཉལ་བའི་ཛ་དྲག་གི་གནས་སྟངས་དེ་དག་གི་མཚན་མ་ཕྱིར་ཐོན་པ་ཞིག་ཡིན། དེར་བརྟེན་མངའ་ཁུལ་དེ་དག་གི་དཀའ་རྙོག་སེལ་བའི་ཆེད་ས་གནས་དེ་གའི་འབྲེལ་ཐོགས་ཡུལ་གྲུ་ཆེ་ཆུང་དང་། ཁྱོན་འབོར་ལ་མ་བལྟོས་པའི་མི་རིགས་ཚང་མའི་ཁེ་ཕན་གཞི་རྩར་བཟུང་བའི་ཐབས་ལམ་ཞིག་ལ་བརྟེན་དགོས་པ་ཡིན། གལ་ཏེ་ཐད་ཀར་འབྲེལ་བ་ཡོད་པའི་མི་དམངས་ཀྱི་བསམ་འདུན་གཞི་རྩར་བཞག་སྟེ་དཀའ་ངལ་དེ་དག་ཁྱབ་ཆེ་ས་ནས་སེལ་བའི་ཐབས་ལམ་ལ་མ་བརྟེན་པར། དེ་དག་གི་ཆ་ཤས་ཙམ་མམ། ཡང་ན་འཕྲལ་སྒང་གི་དཀའ་ངལ་སེལ་ཐུབ་ཙམ་བྱས་ཚེ། དེ་ནི་གསར་དུ་དཀའ་རྙོག་བཟོ་རྒྱུ་ཙམ་ལས་མ་འདས།

བོད་མི་ཚོས་ས་ཁུལ་ཞི་བདེ་དང་། འཛམ་གླིང་ཞི་བདེའི་དོན་དུ་མཐུན་འགྱུར་གྱི་ལེགས་སྐྱེས་འབུལ་འདོད་ཡོད་ཅིང་། དེ་ལྟར་ཐུབ་རྒྱུར་བོད་མི་ཚོར་ཐུན་མོང་མ་ཡིན་པའི་ཁྱད་ཆོས་དམིགས་བསལ་ཅན་ཞིག་ཡོད་པར་ངོས་ལ་ཡོད་ཆེས་ཡོད། རྒྱུན་སྲོལ་གྱི་ཆ་ནས་བོད་མི་རྣམས་ནི་ཞི་བདེར་དགའ་ཞིང་། འཚེ་མེད་ཞི་བའི་ལམ་བཟང་ལ་གཅེས་འཛིན་བྱེད་མཁན་གྱི་མི་རིགས་ཤིག་ཡིན། མི་ལོ་སྟོང་ཕྲག་གི་གོང་བོད་དུ་ནང་ཆོས་དར་བ་ནས་བཟུང་བོད་མི་ཚོས་སེམས་ཅན་ཐམས་ཅད་ལ་འཚེ་བ་སྤོང་བའི་ལམ་ལ་འཇུག་པ་དང་། ཀུན་སློང་འདི་བཞིན་བོད་རྒྱལ་ཁབ་ཀྱིས་རྒྱལ་སྤྱིར་འབྲེལ་ལམ་བྱེད་ཕྱོགས་ལའང་ཁྱབ་ཡོད། ཨེ་ཤ་ཡའི་སྙིང་དབུས་སུ་གནས་པའི་དམག་ཡོད་པར་བརྟེན་གླིང་ཆེན་འདིའི་བྱུང་རབས་ལོ་རྒྱུས་ཀྱི་ཐོག་མཐའ་བར་གསུམ་ནང་གླིང་འདིར་ཞི་བདེ་དང་ལྷིང་འཇགས་སྤེལ་བའི་གལ་ཆེའི་བྱེད་སྒོའི་འགན་འཁུར་ཁག་ཡོད། རྒྱུ་མཚན་དེ་ལ་བརྟེན་ནས་དེ་སྔོན་ཨེ་ཤ་ཡའི་རྒྱལ་ཁམས་ཀྱི་མངའ་བདག་གོང་མ་ཚོས་བོད་ནང་ཕན་ཚུན་སུ་ཞིག་གི་སྟོབས་ཤུགས་མ་སླེབས་པའི་ཆེད་དུ་ཕན་ཚུན་གཅིག་གིས་ཐབས་ཤེས་འབད་བརྕོན་རྒྱ་ཆེ་བ་བྱས་ཡོད། བོད་དེ་བར་གནས་རང་བཙན་རྒྱལ་ཁབ་ཀྱི་ངོ་བོར་གནས་པའི་རིན་ཐང་དེ་གླིང་ཆེན་འདིའི་ཞི་བདེ་ལྷིང་འཇགས་ཀྱི་དོན་གནད་དང་ཁ་འབྲལ་དུ་མི་རུང་བ་ཞིག་ཡིན།

ཕྱི་ལོ་༡༩༤༩།༥༠ ནང་གསར་དུ་བྱུང་བའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་དུ་བཙན་འཛུལ་བྱས་སྟངས་སྔར་མེད་འཁྲུག་རྩོད་ཀྱི་རྐྱེན་རྩ་གསར་པ་ཞིག་བྱུང་ཡོད། གནས་སྟངས་འདི་དག་ཕྱི་ལོ་ ༡༩༥༩ ལོར་བོད་རྒྱལ་ཡོངས་སུ་རྒྱ་མིར་ངོ་རྒོལ་སྒེར་ལངས་བྱས་ཏེ་ངོས་རྒྱ་གར་དུ་བཙན་བྱོལ་ལ་ཡོང་རྗེས་རྒྱ་དཀར་ནག་དབར་གྱི་ཉེན་ཚབས་ཆེ་བའི་གནས་ཚུལ་དེ་ཇེ་སྡུག་ཇེ་ཞན་དུ་སོང་སྟེ་ཕྱི་ལོ་༡༩༦༢ ལོར་ས་མཚམས་སུ་དམག་འཁྲུག་བྱུང་བ་བཅས་ཀྱིས་གནས་གནས་སྟངས་ཇེ་གསལ་དུ་ཕྱིན་པ་དང་། དེང་སྐབས་ཧི་མ་ལ་ཡའི་ས་མཚམས་ཀྱི་ཕྱོགས་གཉིས་ཀར་དྲག་པོའི་དཔུང་དམག་ཁྱོན་ཆེ་བསྡུ་གསོག་གིས་སླར་ཡང་ཛ་དྲག་གི་ཉེན་ཚབས་ཇེ་ཆེར་གྱུར་ཡོད།