བོད་བཙན་པོའི་རྒྱལ་རབས་ཀྱི་གནའ་རྫས་ནང་ཆེས་སྔ་པའི་ཅོང་ཆེན་པོ་ཞིག་གསར་དུ་རྙེད་པ།

 ནུབ་བྱང་མི་རིགས་སློབ་གྲྭ་ཆེན་མོའི་དགེ་རྒན་ལྷ་མཆོག་རྒྱལ་གྱིས་ད་ཡོད་བོད་བཙན་པོའི་རྒྱལ་རབས་ཀྱི་གནའ་རྫས་ནང་ཆེས་སྔ་ཤོས་ཡིན་པའི་ཅོང་ཆེན་པོ་ཞིག་གསར་དུ་རྙེད་པ།

     དྲིལ་ཆེན་ཁྲོ་ཟངས་འདྲེས་མས་གྲུབ་པ་དེའི་ལྗི་ཚད་སྤྱི་རྒྱ168ཡོད་པ་དང་།མཐོ་ཚད་ལ་ཀུང་ཧྥིན54ཡོད་ཅིང་།དྲིལ་ཁའི་ཁ་ཞེང་ལ་ཀུང་ཧྥིན52 དྲིལ་ཞབས་ཀྱི་འཕྲེད་ཞེང་ལ་ཀུང་ཧྥིན40 དྲིལ་ཆེན་དེའི་ཕྱི་དབྱིབས་ནི་པད་མ་འདབ་བརྒྱད་དུ་བཞེངས་ཡོད་ལ།པད་ལྕེ་རེ་རེའི་དྲིལ་བུའི་ཁ་བྱང་གི་གོང་དུ་སྟག་མགོའི་རི་མོ་སྤྲིན་རིས་དྲུག་བཀོད་ཡོད།ཁ་བྱང་ནི་བཙན་པོའི་དུས་སྐབས་ཀྱི་འབྲི་ཚུགས་དབུ་ཅན་གྱིས་ཚེག་གིས་བར་ཆོད་མེད་པར་གཡོན་ནས་གཡས་སུ་རྒྱུན་མར་བྲིས་ཡོད་ལ།ཁ་བྱང་འབྲི་མཁན་གྱི་མིང་གི་ཡིག་འབྲུ་མི་གསལ་བ་མ་གཏོགས་ཚང་མ་གསལ་ལྷང་ངེ་ངོས་འཇིན་ཐུབ།དྲིལ་བུའི་ཁ་བྱང་གི་ཚིག་གི་ཡི་གེ་གོ་བདེར་བཀྲལ་ན་འདི་ལྟར་ཡིན་ཏེ།བོད་ཀྱི་ལྷ་བཙན་པོ་ཁྲི་ལྡེ་གཙུག་བཙན་སྤུན་མཆེད་གཉིས་ཀྱི་སྐུ་ཡོན་དུ་བསྔོ་བའི་ཕྱིར།ཞང་བློན་ལྷ་སྒྲ་རྒྱལ་སླེབས་ཕ་སྤད་གཉིས་ཀྱིས་ཇག་རོང་དགའ་ལྡན་བྱིན་ཆེན་གཙུག་ལག་ཁང་གི་མཆོད་པའི་རྐྱེན་དུ་དྲིལ་བུ་ཆེན་པོ་ཞིག་ཕུལ་བའི་དགེ་བའི་ཕན་ཡོན་གྱིས་ཡོན་བདག་དང་སེམས་ཅན་ཐམས་བཅད་བླ་ན་མེད་པའི་བྱང་ཆུབ་ཀྱི་རྒྱུ་ཐོབ་པར་སྨོན་ནོ།།

    དྲིལ་བུ་འདི་ལྕགས་ཀོང་་་་་་གིས་ཡི་གེ་བྲིས་ཤིང་དགེ་སློང་ཆོས་ཕྲིན་གྱིས་བླུགས་སོ་ཞེས་པ་དང་།ཚིག་འབྲུ་དོན་གྲངས་ཙམ་ལས་མེད་ཀྱང་གོང་ལྷ་བཙན་པོ་དང་བར་ཞང་བློན།འོག་དྲིལ་ཆེན་བླུགས་མཁན་སོགས་མི་སྣ་དྲུག་དང་འབྲེལ་བ་དམ་པོ་ཡོད་པས་བོད་བཙན་པོའི་རྒྱལ་རབས་ཀྱི་ལོ་རྒྱུས་ནང་དོན་ཧ་ཅང་ཕུན་སུམ་ཚོགས་པ་ཞིག་འདུས་ཡོད་པས་ན།བོད་ཀྱི་མཁས་དབང་ཨ་ལགས་དོར་ཞི་ཚང་གིས་དྲིལ་ཆེན་དེ་དང་དཔྱད་རྩོམ་དེ་ནི་བོད་རིག་པ་ཞིབ་འཇུག་ལ་མཚོན་ན་རིན་ཐང་ཆེན་པོ་ལྡན་ཞིང་བོད་ཀྱི་ལོ་རྒྱུས་ཡང་བསྐྱར་འབྲི་དགོས་བྱུང་བར་ཐུག་ཡོད་ཅེས་ལོ་རྒྱུས་རིག་པ་བ་དག་ལ་ཚ་ལང་བར་བྱེད་པའི་སྐད་ཆ་ལབ་ནས་ཡོད་པ་རེད།།

   གསར་འགོད་པས་དགེ་རྒན་ལྷ་མཆོག་རྒྱལ་ལ་གནའ་རྫས་འདི་འདྲ་གལ་ཆེན་ཞིག་ཁྱེད་ཀྱིས་གང་ནས་ཪྙེད་པ་ཡིན་ཞེས་དྲིས་པར།ཁོང་གིས་“གཞེས་ནིང་ལོར་གནའ་རྫས་ཚོང་ར་ཞིག་ཏུ་འཆམ་འཆམ་དུ་འགྲོ་དུས་རྙེད་ཅིང་བླུས་པ་ཡིན”ཟེར་ལ།གནའ་དྲིལ་སྟེང་བཙའ་ཆགས་པའི་ཚད་ལ་བརྟག་ནས་ཅོང་ཆེན་དེ་ཡོན་རྒྱལ་རབས་སྐབས་སུ་ཇག་རོང་དགོན་ནས་དམངས་ཁྲོད་དུ་འཁྱམས་ཏེ་ས་འོག་ཏུ་སྦས་པ་ཞིག་ཏུ་བཤད་དོ།།   ཅོང་འདི་ནི་ཕལ་ཆེར་སྤྱི་ལོ་712ལོར་བཙན་པོ་སྲོང་བཙན་སྒམ་པོའི་ཡང་ཚ་ཁྲི་གཙུག་ལྡེ་བཙན་བོད་བཙན་པོའི་རྒྱལ་བོའི་ཁྲིར་བཀོད་རྗེས་ཀྱི་ཅུང་མ་འགོར་བའི་དུས་སུ་བཞེངས་པ་ཡིན་ལ།ད་ལྟ་བསམ་ཡས་གཙུག་ལག་ཁང་དང་།ཁྲ་འབྲུག་དགོན།བྲག་ཡེར་བའི་དགོན་དུ་ཡོད་པའི་བོད་བཙན་པོའི་རྒྱལ་རབས་ཀྱི་དྲིལ་ཆེན་གསུམ་ནི་སྤྱི་ལོ779ལོའི་རྗེས་སུ་བཞེངས་བ་ཡིན་ཡང་།ད་ཡོད་ཀྱི་བོད་བཙན་པོའི་རྒྱལ་རབས་ཀྱི་རྡོ་རིང་དང་ཅོང་ཆེན་ཉི་ཤུ་ལྷག་ཡོད་པའི་ནང་ཚུད་མེད་པ་མ་ཟད་ད་དུང་ཆེས་སྔ་ཤོས་དེར་གྱུར་ཡོད།དེའི་རྐྱེན་གྱིས་ཅོང་ཆེན་འདི་ལ་ལོ་ངོ་ཆིག་སྟོང་སུམ་བརྒྱ་ལྷག་གི་ལོ་རྒྱུས་ལྡན་ཞིང་།གནའ་དྲིལ་འདིའི་གནའ་དང་མའི་མཆོད་གནས་ནི་དེའི་སྟེང་གི་ཁ་བྱང་ཡི་གེ་ལྟར་ཇག་རོང་དགའ་ལྡན་བྱིན་ཆགས་གླིང་ཡིན་ལ།ཇག་རོང་ཟེར་བ་དེ་དཔའ་རིས་གཞུང་དྲུག་གམ་ལུང་དྲུག་གི་ཡ་གྱལ་ཞིག་ཡིན་ཡང་།གནའ་དགོན་དེ་དེང་ཡང་དཔའ་རིས་བོད་རང་སྐྱོང་རྫོང་ཡར་ལུང་ཐུར་ཆེན་དགོན་གྱི་དང་མའི་རྨང་གཞི་ཡིན་ཚོད་ཆེ།ཡར་ལུང་དགོན་འདི་ལོ་རྒྱུས་ཐོག་དར་རྒུད་གང་མང་བྱུང་ཡོད་ལ་མདོ་སྨད་ཆོས་འབྱུང་ཐོག་ཇག་རོང་ཡར་ལུང་ཐུར་ཆེན་དགོན་དགའ་ལྡན་བྱམས་པ་གླིང་ཞེས་པ་ལས་གནའ་དགོན་གྱི་མིང་དང་ཆ་འདྲ་ས་མང་།དེར་མ་ཟད་ད་ལྟ་བོད་ཀྱི་དེབ་ཐེར་དང་བོད་རིག་པའི་ཞིབ་འཇུག་པ་ཚོས་བོད་དུ་དགོན་པ་སྔ་ཤོས་བསམ་ཡས་གཙུག་ལག་ཁང་དང་རབ་བྱུང་བ་ཐོག་མ་སད་མི་མི་བདུན་ཡིན་པ་གཅིག་མཐུན་གྱི་ལྟ་ཚུལ་དུ་གྲུབ་ཡོད་མོད།འོན་ཀྱང་དྲིལ་བུ་འདིའི་ཁ་བྱང་ཡི་གེ་ལ་དཔྱད་ན་དུས་དེའི་སྔོན་ལ་དཔའ་རིས་སུ་བོད་ཀྱི་དགོན་སྡེ་དང་གྲྭ་བཙུན་སོགས་ཡོད་ཚོད་འདུག་པ་སོགས་དགེ་མཚན་གསར་བའི་ལོ་རྒྱུས་ཀྱི་ཤོག་ལྷེ་གལ་ཆེན་ཞིག་ཁ་ཕྱེས་ནས་ཡོད་དོ།།