ཨ་རིའི་གྲོས་ཚོགས་འཐུས་མི་རྣམས་ཀྱིས་བོད་དོན་ཉན་ཞིབ་སྐབས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་མྱ་ངན་ངག་བཅད་གནང་རྗེས་རྒྱ་ནག་གཞུང་ལ་སྐྱོན་བརྗོད་ཤུགས་ཆེ་བྱས་པ།

༢༠༡༥ ཟླ་ ༥ ཚེས་ ༡༥ རེས་གཟའ་ལྷག་པ།

༄༅། །ཕྱི་ལོ་ ༢༠༡༥ ཟླ་ ༧ ཚེས་ ༡༤ ཉིན་ཨ་རིའི་གྲོས་ཚོགས་ཀྱི་ ཊོམ་ལེན་ཊོ་སི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཆུང་ Tom Lantos Human Rights Commission གི་ཚོགས་ཁང་ནང་དུ། བོད་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་ཉན་ཞིབ་གནང་སྐབས། ཨ་རིའི་གྲོས་ཚོགས་འཐུས་མི་རྣམ་པས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་བཙོན་ཁང་ནང་སྐུ་གཤེགས་པར་ཁོང་ཁྲོ་དང་བློ་ཕམ་ཧ་ཅང་ཆེན་པོས་མྱ་ངན་གུས་འདུད་མཚོན་ཆེད་ངག་བཅད་ཞུས་འདུག ཉན་ཞིབ་སྐབས་གྲོས་ཚོགས་འཐུས་མི་རྣམ་པས། རྒྱ་ནག་གཞུང་གིས་བོད་ཐོག་ལག་བསྟར་བྱེད་བཞིན་པའི་དམ་བསྒྲགས་ཅན་གྱི་སྲིད་བྱུས་ལ་ཨ་རིའི་གཞུང་གིས་སྐྱོན་བརྗོད་བྱེད་བཞིན་ཡོད་ཀྱང་རྒྱ་ནག་གཞུང་ལ་གནོན་ཤུགས་གང་ཡང་སྤྲོད་ཐུབ་ཀྱི་མི་འདུག ཅེས་སྐྱོན་བརྗོད་ཤུགས་ཆེ་གནང་བ་དང་སྦྲགས། ཨ་རིའི་གཞུང་གིས་རྒྱ་གཞུང་ལ་གནོན་ཤུགས་ཆེ་རུ་གཏོང་དགོས་པའི་རེ་འདུན་བཏོན་འདུག གཞན་ཡང་སྐབས་དེར་རིན་པོ་ཆེ་མཆོག་གི་སྐུ་ཕུང་ནང་མིར་རྩིས་སྤྲོད་ཀྱིས་བོད་ཀྱི་སྲོལ་རྒྱུན་ལྟར་མཆོད་འབུལ་སོགས་བྱེད་འཇུག་དགོས་པའི་རེ་འདུན་བཏོན་འདུགདེ་ཡང་གྲོས་ཚོགས་འཐུས་མི་སྐུ་ཞབས་ཇིམ་མེཁ་གྷོ་ཝན་ McGovern མཆོག་དང་སྐུ་ཞབས་པི་ཊིསི་ Pitts མཆོག་རྣམ་གཉིས་ཀྱིས་གོང་སྨྲོས་རྟོག་ཞིབ་ཚོགས་ཆུང་གི་ཚོགས་གཙོ་སྦྲེལ་པོ་གནང་ནས། ཉན་ཞིབ་དབུ་འཛུགས་གནང་བ་དང་སྦྲགས། རྒྱ་ནག་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་མྱ་ངན་ལས་འདས་རྗེས་བོད་ཀྱི་གནད་དོན་དེ་རང་བཞིན་གྱི་ཡལ་འགྲོ་རྒྱུའི་ཁོག་རྩིས་ནོར་བ་ཞིག་རྒྱག་བཞིན་ཡོད་སྐོར་དང་། བོད་ཀྱི་གནད་དོན་མ་གསལ་བར་ཨ་རིའི་གཞུང་གིས་བོད་དོན་བློས་གཏོང་ནམ་ཡང་བྱ་རྒྱུ་མིན་སྐོར་གསུངས་ཡོད།
ཕྱོགས་མཚུངས་སྐབས་དེར་སྐུ་ཞབས་པི་ཊ་སི་མཆོག་ནས་རྒྱ་གཞུང་གིས་བོད་ནང་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་དང་ཆོས་དད། དེ་བཞིན་འདུ་འཛོམས་བྱ་རྒྱུའི་རང་དབང་བཅས་ལ་དམ་བསྒྲགས་བྱ་རྒྱུའི་སྲིད་བྱུས་དང་། བོད་མི་རྣམས་བོད་ཀྱི་ཕྱི་ཙམ་མ་ཟད། བོད་ནང་གི་ས་ཁུལ་ཁག་ཏུའང་རང་དབང་ཐོག་ནས་འགྲུལ་ཞུད་བྱ་རྒྱུའི་ཐོག་ཐང་བརྡལ་བཤིག་བཏང་ནས་དམ་བསྒྲགས་བསུན་གཙེར་བཟོ་བཞིན་པའི་སྲིད་བྱུས་ལ་སེམས་ཚབས་ཀྱི་རྣམ་པ་ཤུགས་ཆེན་བཏོན་ནས་སྐྱོན་བརྗོད་གནང་འདུག སྐབས་དེར་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ས་རཱ་སི་ཝེལ་ Ms. Sarah Sewall མཆོག་ནས་ཀྱང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱའི་བཙོན་ཁང་ནང་སྐུ་གཤེགས་པར་བློ་ཕམ་དང་ཁོང་ཁྲོའི་རྣམ་པ་ཤུགས་ཆེ་བཏོན་པ་དང་སྦྲགས། ཉེ་ལམ་བོད་མི་ཚོས་རང་ལུས་མེར་སྲེག་གི་ལས་འགུལ་སྤེལ་བཞིན་པ་དེས་བོད་ནང་གི་གནས་སྟངས་ཇི་ཞེན་ཇི་སྡུག་ཏུ་སོང་ནས་བོད་མི་དེ་དག་ད་ཆ་འུ་ཐུག་ཐབས་ཟད་ཀྱི་གནས་སུ་གྱར་བཞིན་ཡོད་པ་ཧ་ཅང་གསལ་པོ་ཡིན་སྐོར་གསུངས་པ་དང་སྦྲགས། དེ་བཞིན་ལྕམ་སྐུ་མཆོག་གི་འབྲེལ་མཐུད་ལས་ཁུངས་ནས། རྒྱ་ནག་གཞུང་གི་འགོ་ཁྲིད་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་འབྲེལ་མོལ་བསྐྱར་གསོ་གནང་དགོས་པ་དང་། བོད་ནང་གི་འགྲོ་བ་མིའི་ཐོབ་གོང་སྤེལ་གཏོང་དགོས་པ། བོད་མིའི་ཆོས་དད་རང་དབང་སྲུང་སྐྱོབ་དགོས་པ། བོད་ནང་གཞུང་འབྲེལ་མི་སྣ་དང་ཕྱི་མི་མང་ཚོགས་རྣམས་རང་དབང་ཐོག་འགྲོ་སྐྱོད་ཆོག་པའི་ཐོབ་ཐང་སྤྲད་ནས་དངོས་གནས་རྟོག་ཞིབ་བྱེད་འཇུག་དགོས་པ་དང་། བོད་མིའི་ཐུན་མིན་སྐད་ཡིག་དང་རིག་གཞུང་ཕྱུག་པོ་ཡོད་པ་རྣམས་ལ་བདག་གཅེས་དགོས་པའི་རེ་འདུན་དོན་ཚན་བཞི་ཅན་ཞིག་རྒྱ་ནག་གཞུང་གིས་ལག་བསྟར་དགོས་པ་ནན་བརྗོད་གནང་འདུགགཞན་ཡང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་དང་ཡུན་རིང་ནས་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན། དེ་བཞིན་༸གོང་ས་མཆོག་ལ་དད་གུས་ཧ་ཅང་ཞུ་མཁན། ད་ལྟ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་རི་ཆ་ཌི་སྒེར་ Richard Gere ལགས་ཀྱིས་ཉན་ཞིབ་ཐོག ཐེངས་འདིར་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་བཙོན་ཁང་དུ་སྐུ་གཤེགས་པ་དེས་ང་ཚོས་གདུག་རྩུབ་ཅན་གྱི་སྲིད་བྱུས་ཇི་འདྲ་ཞིག་ལ་ཁ་གཏད་བཅོག་བཞིན་ཡོད་པ་དྲན་བཀུལ་གསལ་པོ་གཏོང་བཞིན་ཡོད་སྐོར་དང་། བོད་ནང་གི་གནས་སྟངས་ཛ་དྲག་ཇི་འདྲ་ཡིན་སྐོར་ར་སྤྲོད་གསལ་པོ་གནང་འདུག དེ་བཞིན་སྐབས་དེར་གྲོས་ཚོགས་འཐུས་མི་རྣམས་ཀྱིས་རྒྱ་ནག་གཞུང་གིས་ཨ་རིའི་ལས་བྱེད་རྣམས་བོད་དུ་རང་དབང་ཐོག་འགྲོ་བསྐྱོད་བྱ་རྒྱུར་དམ་བསྒྲགས་བྱེད་བཞིན་པ་དེར། ཡར་ལན་སྤྲོད་ཆེད་རྒྱ་ནག་གཞུང་གི་ལས་བྱེད་པ་རྣམས་ཨ་རིའི་ནང་འགྲོ་བསྐྱོད་ཀྱི་རང་དབང་ཐོག་དམ་བསྒྲགས་ཇི་འདྲ་བྱ་དགོས་མིན་ཐོག་གོ་བསྡུར་སྦྱང་བཤད་གནང་འདུག ཉན་ཞིབ་ནང་མཉམ་ཞུགས་གནང་མཁན་ཚོགས་བཅར་བ་རྣམས་ཀྱིས་ཉན་ཞིབ་གནང་རིང་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་སྐུ་པར་ལག་ཏུ་བཟུང་ནས་བཞུགས་འདུག །